TUKANG KIRITIK (Naskah Drama Pendek)

TUKANG KIRITIK

(Karya Zamzam Almubarok)

OON                :  (maca koran; naskah dibaca di koran) Aish gehel, harga jengkol 90.000/kg. SALEDRI 120.000/kg. Negara Indonesia anu subur tapi sandang pangan sagala ti batur, tomat diimpor ti cina, beas diimpor ti vietnam,  ck ck ck teu kaharti kahayang masarakat, kebon jeung sawah lalega, tapi beas meuli keneh ti warung, kukulutuk mun teu kabagean raskin, cabe bonteng nyiar keneh ka cikurubuk. Atuh  da mikirna kana melak albiso wae, sugan isuk mah kudu dahar jeung lalab albiso siganamah. Hah sok araraneh...

UJANG            : Punten bu, tos tabuh dua, saur bapa, ibu teu acan netepan lohor.  Bilih kalangkung.

OON                :  Enya jung we tiheula kituh, keur sibuk mikiran rahayat Indonesia ibu mah

Tah berita naon deui yeuh. (maca koran; naskah dibaca di koran) Pendukung partai hayam pelung bentrok jeung pendukung partai hayam biler. Aya ku hobi kana rariweuh teh ari masyarakat Indonesia, mani asa aing pang kidulna, rela tohtohan ngadukung partaina, rela abring-abringan kompanyeu ka kota, bahkan teu paduli di jalan papanasan bari cocorowokan, nepi ka wani bela jeung gelutna, bahkan mun perlu nepi ka paehna. Padahal di imah can kabeuli uyah-uyah acan, anak pamajikan engap-engapan, balong totos ku keyep nepi ka laukna beak ku sero teu karoris-roris acan. Ceuk kuringmah ulah loba ngurus anu lain uruskeuneun, lah, tingali kana diri loba keneh omeaneun. Ck ck ck

UJANG            : Punten bu, saur bapa waktos parantos ashar, ibu teu acan netepan lohor

OON                : Astaghfirullohaladzim. Haduh nepi ka kapohoan solat mikiran nagara. Tapi da gusti mah maha pangampura. Keun we da lohormah isuk deui ge aya,... tah naon deui yeuh.

(maca koran; naskah dibaca di koran) Bapa gubernur leuwi pamulang didemo rahayat pedah korupsi BANSOS alias bantuan sosial. Ck ck ck, asa ku araraneh, anu milih gubernur teh pan rahayat, anu ngademo oge rahayat. Rek nangtung pada ngadukung, geus nangtung pada rek nuar.

UJANG            : Punten bu, saur bapa

OON                : Innalillahi, enya kituh ibu ka masjid sholat ashar ayeuna

UJANG            : Sanes eta, bu. Ceuceu Ijem anu gaduh hutang tea saurna mal waka mayar ayeuna. Margi pameng surnah nuju lebaran. Artosna kange meser acuk murangkalihna.

OON              : Geura etah ari si Ijem,  melaan meuli baju hutang engke dibayar. Cing atuh ijem ijem

UJANG            : Tamih deui bu, saur bapa parantos jam 5. Ibu teu acan netepan lohor sareng ashar

OON                : Astaghfirullohaladzim, gusti.

40 tahun kemudian 

NINI                 : Teu kaharti ningali paripolah incu, buuk  dibeureuman, pakean teu mararatut. Ceunah nurutan artis. Tapi manehna teu bisa nepak tagoni-tagoni acan, ari dititah ngala suluh pajarkeun gengsi. Tapi lamun telat nyangu, manehna sambutut. Budak satepak geus resep cicintaan, nga sms ka kabogoh geus bentes nyebut amih apih, pok teh cenah. Ayang udah mamam blom? Blom, apih lagi ngapain? Karunya ka incu, meunang pangaruh goreng tina majuna teknologi. Beu

UJANG            : Punten Ni, parantos jam 5. Nini teu acan netepan ashar

NIN I                : Astaghfirullohaladzim. Kunaon nini teh bet poho wae kana solat?

UJANG            : Ti kapungkur oge nini mah sok hilap wae pami dipiwarang netepan teh da sibuk wae ngemutan Negara Republik Indonesia. Kantenan ayeuna, nini tos 60 tahun.

NINI                 : Astaghfirulloh. Geuning nini teh geus kolot? Kumaha si ijem geus lunas hutang-hutangna?

UJANG            : aeh ari nini, Kan Ni Ijem teh tos ngantunkeun tadi enjing-enjing. Malih ayeuna aya pangaosan di masjid.

NINI                 : Innalillahi wainna ilaihi rojiun. Nun gusti hapunten dosa si ijem. Audzubillahiminasyaitonirrojim...

Emm em kumaha nya ngadoakeun anu maot teh?

UJANG            :  Ne?

NINI                 :  Ah sholat jenazah heula we. Jang ari sholat jenazah teh sarua jeung sholat subuh kitu?

UJANG            : Nene?

NINI                 : Ah ngaos heula we. Dihejah

UJANG            : Nene!!!

NINI                 : kumaha jang, nini teh geuning can bisa ngaji. Karunya can hadiah jang si ijem.

UJANG            : Nene teu acan netepan ashar, ayeuna tos bade maghrib

NINI                 : astaghfirullohaladzim...gusti hapunten dosa-dosa masyarakat negara republik Indonesia. Hapunten dosa abdi, gusti

UJANG            : Waktos magrib mung kantun 3 menit deui, sumangga kanu teu acan netepan ashar dibujeng enggalna bae

NINI                 : enya jang, enya. ke, pan susukan teh urug cenah. Caina kapegat di hilir. Atuh nini teu bisa wudhu

UJANG            : Ka ranca we, ne.